#معلومه_ونصيحه 😉 🪙
كله عمال يقول البرافيكتو والسمباريكا بتعالج الديدان مع القراد زي ما كانوا بيقولولي ان السمك مضر للكلب ايوه والله زي ما بقولك كده
طب ما تيجي نشوف ده ونشوف ده ونقرر مع بعض
برافيكتو (Bravecto): دواء أساسه مادة اسمها فلورالانر (Fluralaner) ومتحاولش تقري اسمها متتعبش نفسك😀
وهي ماده فعاله جدا ضد القراد والبراغيث ، لكن لا يعالج الديدان ( لا ديدان معوية ولا ديدان قلبية )
سمباريكا (Simparica): يحتوي على مادة اسمها سارولانير (Sarolaner) برضو بيشتغل ضد القراد والبراغيث ، لكنه كمان لا يقتل الديدان.
بالتالي:
ولا برافيكتو ولا سمباريكا بيعالجوا ديدان
طيب هتقولي ازاي ياعم الجواهرجي دا بيقولوا انها بتعالج الديدان يعني هي الناس دي كلها مش بتفهم وانت اللي بتفهم
هقولك لا طبعا مقدرش اقول كده بس يمكن المعلومه ناقصه عند الناس او اتنقلت بشكل مختلف او يا سيدي روح اسالهم كلهم بيعالجوا الديدان ولا لا هيقولولك اه علشان يبيعوا ويخلصوا البضاعه واللي انت فاهمه
خد مني بقا وانفع نفسك . . . دا انت رغاااااي اوي 😀
هقولك يا سيدي ان في نوع من السمباريكا هو اللي بيعالج الديدان . . . واللي هو سمباريكا تريووووو
سمباريكا تريو مختلف عن سمباريكا العادي:
يحتوي على ثلاث مواد فعالة:
سارولانير (Sarolaner) → يقتل القراد والبراغيث.
موبيدكتين (Moxidectin) → يحمي من الديدان القلبية وبعض الديدان الجلدية.
بايرانتل (Pyrantel) → يقتل الديدان المعوية (زي الإسكارس والأنكلستوما).
بالتالي:
سمباريكا تريو فعلاً بيشتغل ضد القراد + البراغيث + بعض أنواع الديدان (قلبية ومعوية)!
يعني لو كلبك بياخد سمباريكا تريو، بيكون محمي من حاجات كتير في نفس الوقت
طيب مين افضل البرافيكتو ولا السمباريكا . . .
والله في كذا حاجه هقولك عليها وهقول رأي وفي الاخر انت اللي تقرر مش انا
بص يا سيدي هنعملها زي جدول مقارنه صغير
مده العلاج :
برافيكتو 3 شهور واللي يقولك 6 شهور قوله كداب
سمباريكا شهر ونص واللي يقولك غير كده كداب
الامن علي الحمل والرضاعه :
وهنا اهم نقطه بالنسبالي . . .
البرافيكتو الشركة المصنعة ليه هي شركه (MSD) بتقول إنه امن علي الكلبه اثناء الحمل والرضاعه
السمباريكا او السمباريكا تريو صناعه الشركة (Zoetis) والشركه لا توصي باستخدامه اثناء الحمل لعدم اختباره علي الحمل حتي الان
علاج الديدان مع القراد :
البرافيكتو لا يحتوي علي مواد فعاله للقضاء علي الديدان
السمباريكا لا يحتوي علي مواد فعاله للقضاء علي الديدان
السمباريكا تريو يحتوي علي مواد فعاله للقضاء علي الديدان
السعر : طبيعي ان البرافيكتو بيكون اغلي علشان مده الفاعليه ضعف المسباريكا ولكونه أمن علي الحمل والرضاعه
طيب هتيجي وتقولي ايه رايك انت يا عم الجواهرجي :
هقولك اللي انا شايفه اللي تم اختباره واعتمد انه أمن علي النتايه اثناء الحمل والرضاعه هو الاصلح للاستخدام وكده كده لو معندكش نتايه حامل و اشتريت سمباركيا هتيجي بعد شهر ونص تاني ولازم تجيب قرص تاني
هتقولي طب واليدان هقولك هات جرعه ديدان محترمه مع قرص البرافيكتو وتوكل علي الله
انا بديلك المعلومه وانت اللي تقدر تقرر محتاج تستخدم ايه وعلي حسب امكانياتك
اه صحيح الصوره اللي منزلها عالبوست انا اللي مصورها
حلوه صح 😀
ياريت لو استفدت تدعيلي دعوه حلوه من قلبك 🩵
